Xəzərin sahilində: monitorinqlərin hesabatı yayılıb
Əmlak Məsələləri Dövlət Komitəsi Xəzər dənizinin sahilboyu 20-50 metrlik mühafizə zolağına düşən torpaq sahələrində apardığı monitorinqlərin hesabatını yayıb. 10 sentyabr məlumatına görə, komitənin məhkəmələrə göndərdiyi işlərdən 5-i haqqında qərarların icrasına başlanıb: “Dövlətin müstəsna mülkiyyətində olan torpaq sahəsində inşa edilmiş tiklilər cavabdehlərin hesabına söküləcək, torpaq sahəsinin əvvəlki vəziyyətinə qaytarılması təmin ediləcək. Cinayət Məcəlləsinin 188-ci maddəsi əsasında 76 hal barəsində Daxili İşlər Nazirliyinə məktublar göndərilib, 78 halla bağlı inzibati cərimə tətbiq olunub”.
Nazirlər Kabinetinin 1 aprel 2016-cı il qərarı ilə Xəzər dənizinin sahilboyu 20-50 metrlik zolağının qrafik təsviri təsdiq edilib. Qərara görə, həmin zolağın su səthinin quru ilə təmas xəttinin uzunluğu 752,9 kilometr, zolağa düşən torpaq istifadəçilərinin sayı 517-dir.
Torpaq Məcəlləsinə uyğun olaraq Xəzər dənizinin 20-50 metrlik sahilboyu zolağına düşən torpaq sahələri Əmlak Məsələləri Dövlət Komitəsinin təqdimatı əsasında Nazirlər Kabinetinin qərarı ilə istifadəyə və icarəyə verilə bilər.
Xəzər dənizinin 20-50 metrlik sahilboyu zolağında torpaq sahələrinə dair qanun pozuntusuna yol verən fiziki, vəzifəli və hüquqi şəxslər müvafiq olaraq 4 min manat, 8 min manat və 40 min manat cərimələnir, Cinayət Məcəlləsində isə Xəzər dənizinin sahilboyu 20-50 metrlik zolağının altında olan torpaqlara münasibətdə 7 ildən 10 ilədək müddətə azadlıqdan məhrumetmə nəzərdə tutulub.
