Tədris ili ilə bağlı rəsmi açıqlama
2018-2019 tədris ilində Azərbaycanın ümumi təhsil müəssisələrində 1 milyon 592 min 317 şagirdin təhsil alması proqnozlaşdırılır. 165 min 780 şagird birinci sinifdə oxuyacaq. Təhsil Nazirliyi sentyabrın 10-da belə məlumat yayıb.
Rəsmi açıqlamaya görə, Təhsil Nazirliyi sisteminə daxil olan ümumi təhsil müəssisələrinə müəllimlərin işə qəbulu üzrə müsabiqədə 4053 nəfər müəllim adını qazanıb.
Nazirlik bəyan edir ki, ölkənin müxtəlif bölgələrində 34 yeni məktəb binası tikilir, 22 məktəb binasında isə əsaslı təmir-bərpa işləri aparılır. 2018-ci ildə 137 modul tipli təhsil müəssisəsi istifadəyə veriləcək. Ümumilikdə Bakı şəhəri və ölkənin 54 rayonu olmaqla 193 obyektdə işlər aparılır.
Dövlət ümumtəhsil müəssisələrinin I-XI sinifləri üçün 332 adda 6 milyon 726 min 29 nüsxə dərslik və müəllimlər üçün metodik vəsait çap edilib.
