Rusiyanın əməkhaqqı göstəriciləri
Federal Statistika Xidməti Rusiyanın regionları üzrə orta əməkhaqqı hesabatı açıqlayıb. Novator.az xəbər verir ki, 2018-ci ilin ilk 6 ayına aid hesabata əsasən, Rusiyada orta əməkhaqqı 42 min 555 rubl olub (1034 manat).
Hesabatda ən yüksək maaşı Yamalo-Nenets Muxtar Mahalı sakinlərinin aldığı bildirilir. Bu bölgədə orta maaş 100 min 617 rubl göstərilir (2445 manat).
Maaş reytinqinin ikinci pilləsində Çukot Muxtar Mahalı gəlir: 98 min 291 rubl (2388 manat).
Paytaxt Moskvada sakinlərin 82 min 729 min rubl (2010 manat) aldığı, Maqadan vilayətində orta maaşın 82 min 471 rubl (2004 manat) olduğu vurğulanır.
Hesabata görə, Rusiyada ən az maaşı Altay diyarının sakinləri alır: orta hesabla 24 min 402 rubl (593 manat).
Qaraçay-Çərkəz Respublikasında orta maaş 24 min 481 rubl (595 manat), Çeçen Respublikasında 24 min 873 rubl (604 manat), İvanovo vilayətində 24 min 874 rubl (604 manat) həddində rəsmiləşib.
Novator.az bildirir ki, bu il avqustun 1-nə Azərbaycanda muzdla çalışan işçilərin orta aylıq nominal əməkhaqqı 542,3 manat, iyulun 1-nə Bakıda 789,3 manat olub.
Səidə Hüseynova
