Fəxrəddin Abbasov Rusiyada tutulub
Azərbaycanın beynəlxalq axtarışa verdiyi Fəxrəddin Abbasov sentyabrın 6-da Rusiyanın Moskva vilayətində tutulub. Sentyabrın 7-də Lübertsi Şəhər Məhkəməsi onun haqqında 1 aylıq həbs qətimkan tədbiri seçib. Fəxrəddin Abbasovun Azərbaycana təhvil verilməsi məsələsinə baxılacağı açıqlanıb.
Virtualaz.org xəbər verir ki, Fəxrəddin Abbasova Azərbaycan Cinayət Məcəlləsinin 281.2, 283.1-ci maddələri üzrə ittiham irəli sürülüb, 2018-ci il iyulun 14-də Səbail Rayon Məhkəməsi onun barəsində 4 ay müddətinə həbs qərarı seçib.
Fəxrəddin Abbasov 1956-cı ildə Lerik rayonunda anadan olub. 1993-cü ilin yayından bəri talışların milli hüquqlarını qorumaq adı altında Azərbaycanın ərazi bütövlüyünə qarşı davamlı çağırışları ilə tanınıb.
Cinayət Məcəlləsinin 281.1-ci maddəsinə əsasən, Azərbaycan Respublikasının ərazi bütövlüyünün parçalanmasına yönələn açıq çağırışlara 5 ilədək müddətə azadlıqdan məhrumetmə cəzası düşür.
283.1-ci maddəyə əsasən, milli nifrət və düşmənçiliyin salınmasına yönələn hərəkətlər 8000 manatdan 12000 manatadək miqdarda cərimə və ya 2 ilədək müddətə islah işləri və ya 2 ildən 4 ilədək müddətə azadlıqdan məhrumetmə ilə cəzalandırılır.
