Rusiyada ixrac-idxal göstəriciləri açıqlanıb
Rusiyanın Federal Gömrük Xidməti 2018-ci ilin yanvar-iyul ayları üzrə xarici ticarət hesabatı açıqlayıb. Novator.az-ın məlumatına görə, hesabatda bildirilir ki, yanvar-iyul aylarında Rusiyanın ixracının həcmi 2017-cı ilin 7 ayı ilə müqayisədə 27,9% artaraq 249,1 milyard ABŞ dollarına çatıb. Ümumi ixracın 87,3%-i uzaq xaricin, 12,7%-i MDB ölkələrinin payına düşüb.
Yanvar-iyul aylarında idxalın həcmi ötən ilin müvafiq dövrünə nisbətdə 11,8% yüksələrək 136,9 milyard dollar olub. Malların 88,2%-i uzaq xaricdən, 11,8%-i MDB ölkələrindən alınıb.
2018-ci ilin 7 ayında Rusiyanın əsas xarici ticarət tərəfdaşı kimi Çin göstərilir. Bu ölkə ilə ticarət dövriyyəsi 59,3 milyard dollar təşkil edib.
Rusiya ixracatının 64,2%-i yanacaq-energetika malları olub.
İdxalda əsas yeri maşın və avadanlıq tutub: 46,8%.
Səidə Hüseynova
