Məzənnələr 8 ayda
2018-ci ilə 1,7001 manat rəsmi məzənnə ilə başlayan dollar martın 7-dən banklara 1,7 manata satılır. Bu, manatın devalvasiyaya uğradığı 2015-ci ildən bəri ən uzun sürən rəsmi məzənnədir. 2015-ci ilin iki devalvasiyası ilə dollar 78 qəpikdən 1 manat 55 qəpiyədək bahalaşıb. O vaxtdan bəri ən yuxarı rəsmi məzənnə 2017-ci ilin 1-2 fevralında qeydə alınıb: 1,92 manat. Həmin il dekabrın 13-dən 2018-ci il martın 7-dək isə 1,7001 manatlıq kurs qüvvədə olub.
Bəs digər xarici valyutaların məzənnələri 2018-ci ilin səkkiz ayında necə dəyişib?
Novator.az bildirir ki, avro ilə 2,0431 manatla start verib. Avqust 1,9859 manatla bitib. Hazırda rəsmi qiymət 1,977 manatdır.
Rusiya rublu 2018-ci ildə yola 0,0297 manatla çıxıb. Avqust 0,0249 manatla yekunlaşıb. Sentyabrın 7-də rubl 0,0245 manata təklif olunur.
2018-ci ilə 0,4495 manatla başlayan türk lirəsi səkkiz ayın yekununda 0,2552 manata qədər ucuzlaşıb. İndiki kurs 0,2578 manatdır.
Gürcü larisinin start qiyməti 0,6601 manat olub, avqust 0,6605 manatla tamamlanıb. 7 sentyabr üçün 0,6501 manat qüvvədədir.
Bu il manatı qorumaq üçün keçirilən valyuta hərraclarında Dövlət Neft Fondu 4 milyard 244,8 milyon dollar məbləğində vəsait satıb. Yanvarın hərraclarında fonddan 299,1 milyon dollar, fevralın hərraclarında 364,1 milyon dollar, martın hərraclarında 647 milyon dollar, aprelin hərraclarında 802,6 milyon dollar, mayın hərraclarında 422,7 milyon dollar, iyunun hərraclarında 439 milyon dollar, iyulun hərraclarında 536,6 milyon dollar, avqustun hərraclarında 733,7 milyon dollar məbləğində vəsait alınıb.
