Ermənistanda seçki cinayətlərinin cəzası sərtləşir
Sentyabrın 7-də Ermənistan parlamenti Cinayət Məcəlləsinə dəyişikliklər layihəsini qəbul edib. Novator.az-ın məlumatına görə, yeniliklər seçki prosesində törədilən cinayətlərin cəzalarını sərtləşdirir.
Sənədə əsasən, seçki hüquqlarının həyata keçirilməsinə, seçki komissiyasının işinə və ya seçkidə iştirak edən şəxslərin öz səlahiyyətlərini yerinə yetirməsinə maneçilik törədilməsinə görə həbs cəzasının maksimum həddi 5 ildən 6 ilə artırılır. Təşviqata və təşviqatdan imtinaya məcbur etməyə də eyni cəza düşür.
Seçkinin nəticələrini saxtalaşdırmaqda və səsvermənin gizliliyini pozmaqda günahlandırılan şəxsi 5 il azadlıqdan məhrumetmə cəzası gözləyir. İndiki cəza 3 il həbsdir.
Seçkidə rüşvət alanları 1 ildən 3 ilədək, rüşvət verənləri 3 ildən 5 ilədək, səsverməyə məcbur edənləri 7 ilədək həbs cəzası gözləyir.
Təşviqat dövründə xeyriyyəçilik də cinayət hesab olunur. Belə hərəkətə görə 6 il həbs cəzası nəzərdə tutulur.
Səidə Hüseynova
