Yeni təlimlər
Azərbaycan Ordusunun birləşmə və hərbi hissələrində müxtəlif ixtisaslı əsgər heyəti ilə intensiv döyüş hazırlığı məşqləri davam etdirilir. Mod.gov.az-ın məlumatına görə, ümumqoşun təlim mərkəzində keçirilən məşqlərdə hərbi qulluqçular çöl şəraitində silahlardan müxtəlif tapşırıqları icra edir, tank heyətləri isə zirehli texnikanın idarə olunması üzrə praktiki vərdişlərini təkmilləşdirir.
Başqa bir rəsmi xəbərdə bildirilir ki, Heydər Əliyev adına Azərbaycan Ali Hərbi Məktəbin birinci kurs kursantları ilkin hərbi hazırlıq çərçivəsində atıcı silahlardan atış çalışmalarını icra edirlər. Çalışmaların yekununda gənc kursantlar əldə etdikləri nəticəyə əsasən qiymətləndiriləcək.
Bu arada prezident İlham Əliyev Azərbaycan vətəndaşlarının 2018-ci il oktyabrın 1-dən 30-dək müddətli həqiqi hərbi xidmətə çağırılması və müddətli həqiqi hərbi xidmət hərbi qulluqçularının ehtiyata buraxılması haqqında sərəncam imzalayıb. Sərəncama əsasən, 2000-ci ildə doğulmuş və çağırış gününədək (həmin gün də daxil olmaqla) 18 yaşı tamam olmuş, habelə 1983-1999-cu illərdə doğulmuş, yaşı 35-dək olan müddətli həqiqi hərbi xidmətə çağırılacaqlar.
