Yerevan uğrunda 12 siyasi qüvvə yarışır
Yerevan Şəhər Şurasına sentyabrın 23-də keçiriləcək növbədənkənar seçkiyə 8 partiya və 4 blok qatılıb.
İyulun 9-da Ermənistan paytaxtının meri, sabiq prezident Serj Sərkisyanın sədrlik etdiyi Respublika Partiyasının üzvü Taron Marqaryan istefa verib. Bundan sonra Şəhər Şurasına növbədənkənar seçki təyin olunub. Proporsional üsulla seçilən 65 yerlik Şəhər Şurasında mandatların yarıdan çoxunu götürən qüvvənin siyahısına başçılıq edən şəxs mer postunu tutacaq. Heç bir qüvvə mandatların yarıdan çoxunu əldə etməsə, meri Şəhər Şurası seçəcək.
Novator.az-ın məlumatına görə, seçkiyə bu partiya və bloklar buraxılıb: Çiçəklənən Ermənistan Partiyası, Əriklər Ölkəsi Partiyası, İrs Partiyası, Demokratik Yol Partiyası, Daşnaksütun Partiyası, Ayk Partiyası, İslahatçılar Partiyası, Qanunçuluq Ölkəsi Partiyası, Yerevan ictimaiyyəti bloku, Yerevanlılar bloku, “Mənim addımım” bloku, İşıq bloku.
Partiyalar Şəhər Şurasında təmsil olunmaq üçün azı 6 faiz, bloklar 8 faiz səs toplamalıdır.
Baş nazir Nikol Paşinyanın dəstəklədiyi “Mənim addımım” blokunun siyahısına 1976-cı il təvəllüdlü aktyor Ayk Marutyan başçılıq edir.
