Türk sammiti keçirilir
Sentyabrın 3-ü Qırğızıstanın Çolpon-Ata şəhərində Türkdilli Dövlətlərin Əməkdaşlıq Şurasının VI sammiti keçirilir. Novator.az-ın məlumatına görə, sammitə Azərbaycan prezidenti İlham Əliyev, Qırğızıstan prezidenti Sooronbay Jeenbekov, Qazaxıstan prezidenti Nursultan Nazarbayev, Türkiyə prezidenti Rəcəb Teyyub Ərdoğan qatılıb.
Özbəkistan prezidenti Şövkət Mirziyayev, Tatarıstan prezidenti Rüstəm Minnixanov və Macarıstanın baş naziri Viktor Orban sammitdə qonaq qismində iştirak edirlər.
AZƏRTAC bildirir ki, sammitdən əvvəl İlham Əliyev Qırğızıstan prezidenti Sooronbay Jeenbekovla görüş keçirib.
Sammitin açılışında çıxış edən Türkdilli Dövlətlərin Əməkdaşlıq Şurasının indiki sədri, Qazaxıstan prezidenti Nursultan Nazarbayev deyib ki, VI sammitdə Özbəkistan və Macarıstanın da iştirakı təşkilatın fəaliyyətinin genişlənməsinin və həmrəyliyin gücləndirilməsinin göstəricisidir: “Türk Şurasının fəaliyyətinin güclənməsi ortaya çıxan hədəflərə nail olunmasına mühüm töhfə verəcək”.
Digər dövlət və hökumət başçıları, o cümlədən Azərbaycan prezidenti İlham Əliyev də çıxış ediblər.
Türkdilli Dövlətlərin Əməkdaşlıq Şurası 2009-cu ildə yaradılıb.
