Klub turnirlərində 80 komanda qalır
UEFA Çempionlar Liqası və Avropa Liqasında ələmə raundları arxada qalıb. Novator.az-ın məlumatına görə, 237 klubun buraxıldığı 2018-2019 mövsümünü 80 iştirakçı davam etdirir: Çempionlar Liqasının qrup mərhələsində 32, Avropa Liqasının qrup mərhələsində 48 komanda yarışır.
Təsnifat mərhələlərində 55 UEFA üzvündən 26-nın bütün klubları ələnib. Yalnız İspaniya, Almaniya (7 komanda) və Fransa (6 komanda) itkisiz irəliləyir.
Novator.az bildirir ki, mövsümə 4 komanda ilə start verən Azərbaycan 3 təmsilçisini itirib və 1,875 əmsal toplaya bilib. Hazırda Azərbaycan 18,500 əmsalla 26-cı pillədə durur. Bu reytinq UEFA üzvlərinin Çempionlar Liqası və Avropa Liqasında son beş mövsümdə qazandığı əmsala əsaslanır. Qrup raunduna qədər qələbə 1, heç-heçə yarım xal; qrupda və sonrakı mərhələlərdə qələbə 2, heç-heçə 1 xaldır.
Çempionlar Liqasının qrupuna düşmək 4 bonus xalı, 1/8 finala çıxmaq 5 bonus xalı, hər iki turnirin 1/4 finalına, yarımfinalına və finalına yüksəlmək 1 bonus xalı verir. Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
