Bakı: sərmayədə 21,4 faiz azalma var
Paytaxtın sosial-iqtisadi göstəricilərinə dair yeni hesabat açıqlanıb. Novator.az-ın məlumatına görə, Bakı Şəhər Statistika İdarəsi bildirir ki, 2018-ci ilin yanvar-iyul aylarında sənayedə istehsal olunmuş malların və göstərilmiş xidmətlərin həcmi əvvəlki ilin 7 ayı ilə müqayisədə 0,3 faiz azalaraq 24,1 milyard manat təşkil edib.
Rəsmi hesabata əsasən, yanvar-iyul aylarında şəhərin iqtisadi və sosial sahələrinin inkişafı üçün əsas kapitala 6 milyard 587,7 milyon manat və ya əvvəlki ilin müvafiq dövrü ilə müqayisədə 21,4 faiz az vəsait yönəldilib. Ümumi sərmayənin 53,9 faizi dövlət, 46,1 faizi qeyri-dövlət sektorunun sərmayədarlarının payına düşüb.
7 ayda ticarət dövriyyəsinin həcmi 2017-ci ilin yanvar-iyul ayları ilə müqayisədə 3 faiz, ictimai iaşə dövriyyəsi real ifadədə 5,4 faiz, əhaliyə göstərilən ödənişli xidmətlərin dəyəri 2,3 faiz artıb.
Bakı Şəhər Statistika İdarəsi qeyd edir ki, 2018-ci ilin yanvar-iyun aylarında işçilərin orta aylıq nominal əməkhaqqı əvvəlki ilin müvafiq dövrünə nisbətən 1,6 faiz artaraq 789,3 manata çatıb.
