Orta maaş 3,7 faiz, qiymətlər 2,8 faiz artıb
2018-ci ilin yanvar-iyul aylarında Azərbaycanın iqtisadi və sosial sahələrinin inkişafı üçün əsas kapitala 7 milyard 457,3 milyon manat və ya əvvəlki ilin müvafiq dövrü ilə müqayisədə 17,9 faiz az vəsait yönəldilib. Qeyri-neft sektoruna yönəldilmiş vəsaitin həcmi isə 19 faiz artıb.
Novator.az-ın məlumatına görə, Dövlət Statistika Komitəsi bildirir ki, ümumi sərmayənin 72,5 faizi bilavasitə tikinti-quraşdırma işlərinə sərf edilib. Daxili mənbələrdən əsas kapitala yönəldilmiş vəsait ümumi sərmayənin 56,6 faizi həcmində olub.
Sənaye müəssisələri və bu sahədə fəaliyyət göstərən fərdi sahibkarlar yanvar-iyul aylarında 27,5 milyard manatlıq və ya əvvəlki ilin müvafiq dövrü ilə müqayisədə 0,7 faiz çox sənaye məhsulu istehsal edib. Sənayenin qeyri-neft sektorunda məhsul istehsalı 10,7 faiz artıb, neft sektorunda 0,7 faiz azalıb.
Başqa bir hesabata əsasən, 2018-ci il iyulun 1-nə ölkə iqtisadiyyatında muzdla çalışan işçilərin sayı ötən ilin eyni dövrü ilə müqayisədə 1,2 faiz artaraq 1 milyon 546,2 min nəfərə çatıb, onların 885,7 min nəfəri iqtisadiyyatın dövlət sektorunda, 660,5 min nəfəri qeyri-dövlət sektorunda fəaliyyət göstərib.
Yanvar-iyun aylarında ölkə iqtisadiyyatında muzdla çalışan işçilərin orta aylıq nominal əməkhaqqı əvvəlki ilin müvafiq dövrünə nisbətən 3,7 faiz artaraq 541,1 manat olub.
7 ayda istehlak məhsulları və xidmətlər 2017-ci ilin yanvar-iyul aylarına nisbətən 2,8 faiz, o cümlədən ərzaq məhsulları 2,8 faiz, qeyri-ərzaq malları 3,4 faiz, əhaliyə göstərilən ödənişli xidmətlər 2,3 faiz bahalaşıb.
İyul ayında istehlak məhsullarının və xidmətlərin qiymətləri iyun ayına nisbətən 0,6 faiz, o cümlədən ərzaq məhsullarının qiymətləri 1,5 faiz düşüb, qeyri-ərzaq mallarının və əhaliyə göstərilən ödənişli xidmətlərin qiymətləri isə 0,1 faiz yüksəlib.
Yanvar-iyul aylarında pərakəndə ticarət şəbəkəsində satılmış məhsulların dəyəri əvvəlki ilin eyni dövrünün səviyyəsini müqayisəli qiymətlərlə 2,6 faiz üstələyərək 20,1 milyard manata bərabər olub. Ticarət dövriyyəsinin 10 milyard manatı ərzaq məhsulları, içkilər və tütün məmulatlarının, 10,1 milyard manatı qeyri-ərzaq məhsullarının payına düşüb.
Əhalinin bir nəfərinə düşən orta aylıq pərakəndə ticarət dövriyyəsi 292,7 manat göstərilir.
