Sabiq prokuror həbs edilib
İsmayıllının sabiq prokuroru Ülvi Abbasov həbs edilib. Xəbəri iyulun 27-də bir neçə media qurumu yayıb. Baş Prokurorluğun mətbuat xidmətinin rəhbəri Eldar Sultanov “Amerikanın səsi” radiosuna açıqlamasında Ülvi Abbasov barəsində məhkəmə qərarı ilə həbs qətimkan tədbiri seçildiyini təsdiqləyib.
İyulun 26-da Baş Prokurorluq açıqlama yayaraq bildirib ki, İsmayıllı rayon prokurorunun böyük köməkçisi Faiq Quliyev külli miqdarda rüşvət aldığına görə tutulub, ona Cinayət Məcəlləsinin 311.3.2 (təkrar rüşvət alma ) və 311.3.3-cü (külli miqdarda rüşvət alma) maddələri ilə ittiham elan olunub, barəsində məhkəmənin qərarı ilə həbs qətimkan tədbiri seçilib: “Aparılmış xidməti yoxlama zamanı İsmayıllı rayon prokuroru Ülvi Abbasov və prokurorun böyük köməkçisi Faiq Quliyevin vətəndaşlarla qeyri-prosessual münasibətlərə daxil olmaqla xidməti səlahiyyətlərinin hüdudlarından açıq-aşkar surətdə kənara çıxan hərəkətləri müəyyən edilib.
İstintaqın hərtərəfli, tam və obyektiv aparılmasının təmin edilməsi məqsədi ilə baş prokurorun 25 iyul 2018-ci il əmri ilə Faiq Quliyev prokurorluq orqanlarından xaric edilib, rayon prokuroru Ülvi Abbasov vəzifədən azad olunub”.
Ülvi Abbasov 2016-cı ilin iyun ayından İsmayıllı rayon prokuroru vəzifəsini tutub.
