İlahiyyat İnstitutu tədris proqramını açıqlayıb
İyulun 25-də Azərbaycan İlahiyyat İnstitutu bəzi bilgilər açıqlayıb. Novator.az-a verilən rəsmi məlumata görə, institutda islam, xristianlıq, yəhudilik, hinduizm, buddizm və digər dünya dinlərinin inanc, ibadət, əxlaq sistemi və ictimai strukturları, həmçinin fəlsəfə, sosiologiya, psixologiya, multikulturalizm və sair elmlər tədris olunacaq.
İnstitutda ingilis, ərəb, klassik ibrani, sanskrit, klassik yunan, latın, rus və fars dillərini öyrənmək imkanı var. Bütün xarici dillər 4 dil bacarığının (oxuma, dinləmə, danışma, yazma) inkişafı istiqamətində tədris ediləcək.
Tələbələrə beynəlxalq mübadilə proqramları vasitəsilə Avropa, Amerika, Şərq ölkələrində təhsil almaq və yüksək qiymətlərlə məzun olan bakalavrların ixtisasları üzrə magistratura və doktorantura təhsilini dövlət xətti ilə xarici ölkələrdə davam etdirmək imkanı yaradılacaq.
İlahiyyat İnstitutunda Şərq incəsənəti və musiqisinin xəttatlıq, əbru, təzhib, musiqi kimi sahələrinə aid müxtəlif kurslar təşkil ediləcək.
Tələbələrə din, tarix, fəlsəfə, dil, ədəbiyyat və digər elmlərə dair Azərbaycan, ərəb, türk, ingilis, fars və rus dillərində 12 mindən çox kitabdan istifadə etmək imkanı yaradılıb.
İnstitutda təhsil dövlət sifarişi əsasında həyata keçirilir. Tələb olunan qəbul balı III ixtisas qrupunda minimum 200 baldır. Qəbul planı üzrə islamşünaslıq ixtisasına 35, dinşünaslıq ixtisasına 25 yer ayrılıb.
İlahiyyat İnstitutu tələbələrə hər iki ixtisas üzrə dövlət qulluqçusu, yaxud din xadimi, tədqiqatçı və pedaqoq sahələrində karyera qurmaq imkanı yaradır.
Azərbaycan İlahiyyat İnstitutu prezidentin 9 fevral 2018-ci il sərəncamı ilə Dini Qurumlarla İş üzrə Dövlət Komitəsinin tabeliyində yaradılıb. Sərəncamla Bakı Dövlət Universitetinin ilahiyyat fakültəsinin institutun strukturuna daxil edilməsi tapşırılıb.
Mayın 31-də Ceyhun Valeh oğlu Məmmədov İlahiyyat İnstitutunun rektoru təyin edilib.
