Bakı görüşləri
Türkiyənin xarici işlər naziri Mövlud Çavuşoğlu iyulun 24-ü Bakıda görüşlər keçirib. Onun həmkarı Elmar Məmmədyarovla təkbətək və nümayəndələr heyətlərinin iştirakı görüşündə Ermənistanın Azərbaycana qarşı hərbi təcavüzünü və işğalının regional sülh və təhlükəsizlik üçün ciddi təhlükə olduğu vurğulanıb. Mövlud Çavuşoğlu Ermənistan-Azərbaycan münaqişəsi ilə əlaqədar Türkiyənin mövqeyini bir daha vurğulayaraq münaqişənin BMT Təhlükəsizlik Şurasının qətnamələri əsasında, Azərbaycanın beynəlxalq səviyyədə tanınmış sərhədləri daxilində ərazi bütövlüyü və suverenliyi çərçivəsində həll edilməli olduğunu diqqətə çatdırıb.
Ali qonaq baş nazir Novruz Məmmədovla da bir araya gəlib. Novruz Məmmədov Azərbaycanın və Türkiyənin birgə təşəbbüsü ilə həyata keçirilən qlobal layihələrdən danışaraq deyib ki, Bakı-Tbilisi-Ceyhan, Bakı-Tbilisi-Ərzurum, Bakı-Tbilisi-Qars, TANAP kimi layihələrin reallaşması iki ölkə arasındakı sarsılmaz qardaşlıq münasibətlərini təcəssüm etdirir: “Bu layihələr təkcə bizim ölkələrin deyil, region xalqlarının rifahının artmasına, beynəlxalq əməkdaşlığın güclənməsinə töhfələr verir”.
Baş nazir qeyd edib ki, Türkiyə Dağlıq Qarabağ münaqişəsinin həlli işində də daim Azərbaycanın yanındadır və ölkəyə böyük dəstək göstərir.
