6 ayda 184 vəzifəli şəxsin işi məhkəmələrə göndərilib
2018-ci ilin birinci yarısında 184 vəzifəli şəxs barəsində 115 cinayət işi istintaq olunaraq məhkəmələrə göndərilib. AZƏRTAC xəbər verir ki, bunu baş prokurorun müavini, Korrupsiyaya Qarşı Mübarizə Baş İdarəsinin rəisi Kamran Əliyev iyulun 25-də keçirdiyi mətbuat konfransında deyib. Onun sözlərinə görə, məhkəmələrə göndərilən cinayət işləri arasında qulluq mövqeyindən istifadə ilə mənimsəmə halları (36 faiz) üstünlük təşkil edib: “Məhkəmələrə göndərilən cinayət işlərində vətəndaşlara 51 milyon manat ziyan vurulması müəyyən edilib. Bu ziyanın 16 milyon 578 min manatının vətəndaşlara ödənməsi təmin olunub.
18 şəxs barəsində 9 cinayət işi mənzil-tikinti kooperativlərinin, 43 şəxs barəsində 18 cinayət işi bank və kredit təşkilatlarının fəaliyyəti ilə bağlı olub. Hazırda 117 cinayət işinin ibtidai istintaqı aparılır.
İlin birinci yarısında Korrupsiyaya Qarşı Mübarizə Baş İdarəsi vətəndaşların 3874 müraciətinə baxıb. Həmçinin 126 cinayət xarakterli material araşdırılıb. Həmin materialların 82-si üzrə cinayət işi başlanıb, 44 material üzrə digər prokuror təsir aktları tətbiq edilməklə 28 vəzifəli şəxs intizam məsuliyyətinə cəlb olunub”.
