Vergi orqanlarına şikayətlər 22 faiz azalıb
Vergilər Nazirliyi statistik bilgilər açıqlayıb. Rəsmi hesabata görə, 2018-ci ilin birinci yarısında vergi orqanlarına 47 min 299 müraciət daxil olub, bu da ötən ilin yanvar-iyun ayları ilə müqayisədə 7,4 faiz azdır. Müraciətlərin 93,6 faizi ərizə, 6,1 faizi şikayət, 0,3 faizi təklif xarakterli olub.
6 ayda vergi orqanlarına 2 min 893 şikayətin daxil olduğu, bu sarıdan 22 faiz azalma qeydə alındığı bildirilir.
Yanvar-iyun aylarında vergi orqanlarının aidiyyəti struktur bölmələrinin rəhbərləri və digər vəzifəli şəxsləri ümumilikdə 2 min 183 vətəndaşı qəbul edib.
İlin birinci yarısında qeydiyyatdan keçmiş vergiödəyicilərinin sayı 40 min 706 (6 min 33 hüquqi şəxs, 34 min 673 fiziki şəxs), fəaliyyətini bərpa etmiş vergiödəyicilərinin sayı 47 min 477 göstərilir.
Yanvar-iyun ayları ərzində qeydiyyatdan keçmiş təsərrüfat subyektlərinin sayı 14 min 161 olub, 18 min 92 təsərrüfat subyekti isə fəaliyyətini bərpa edib.
