UEFA-nın klub reytinqində vəziyyət necədir?
UEFA Çempionlar Liqası və Avropa Liqasında 2018-2019 mövsümünün təsnifat və 1-ci mərhələləri arxada qalıb. Novator.az bildirir ki, mövsümə 4 komanda ilə start verən Azərbaycan 3 təmsilçisini itirib və 1,125 əmsal toplaya bilib. Hazırda Azərbaycan 17,750 əmsalla 55 UEFA üzvü arasında 22-ci pillədə durur. Bu reytinq UEFA üzvlərinin Çempionlar Liqası və Avropa Liqasında son beş mövsümdə qazandığı əmsala əsaslanır. Qrup raunduna qədər qələbə 1, heç-heçə yarım xal; qrupda və sonrakı mərhələlərdə qələbə 2, heç-heçə 1 xaldır.
Çempionlar Liqasının qrupuna düşmək 4 bonus xalı, 1/8 finala çıxmaq 5 bonus xalı, hər iki turnirin 1/4 finalına, yarımfinalına və finalına yüksəlmək 1 bonus xalı verir. Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
Hazırda UEFA-nın klub reytinqinə İspaniya başçılıq edir: 86,283 əmsal.
İngiltərə (65,105 əmsal) ikinci, İtaliya (64,368 əmsal) üçüncü, Almaniya (58,998 əmsal) dördüncü, Fransa (49,915 əmsal) beşincidir.
Son beş pillədə Şimali İrlandiya (3,750 əmsal), Lüksemburq (3,625 əmsal), Kosovo (2,250 əmsal), Andorra (1,498 əmsal) və San Marino (0,666 əmsal) dayanır.
