Ölkələrdə əlavə dəyər vergisi
İyulun 24-də Rusiya Dövlət Duması əlavə dəyər vergisini (ƏDV) 18%-dən 20%-ə qaldıran qanun layihəsi qəbul edib. Yenilik rəsmiləşsə, 2019-cu il yanvarın 1-dən qüvvəyə minəcək.
ƏDV istehlakçıya təqdim edilən məhsulun son qiymətinə əlavə olunmuş vergidir. Azərbaycanda 18%-lik ƏDV tətbiq olunur.
Keçmiş SSRİ məkanı ölkələrindən Litva və Latviyada ƏDV 21%, Estoniya, Moldova, Ukrayna, Belarus, Ermənistan və Özbəkistanda 20%, Gürcüstan və Tacikistanda 18%, Türkmənistanda 15%, Qazaxıstan və Qırğızıstanda 12%-dir.
Novator.az başqa ölkələrin də ƏDV göstəricilərinə nəzər salıb.
ƏDV dərəcəsi Macarıstanda 27%, Yunanıstanda 24%-dir.
İtaliya 22%, Argentina 21%, Fransa və Böyük Britaniya 20%, Almaniya 19%, Türkiyə 18% ƏDV tətbiq edir.
Çin və Meksikada 16%-lik ƏDV ödənir.
Cənubi Afrika Respublikasında ƏDV 15%, Cənubi Koreya və İndoneziyada 10%, İranda 9%-dir.
Səudiyyə Ərəbistanında 5% ƏDV tətbiq olunur.
Məhsuldan və bölgədən asılı olaraq Hindistanda ƏDV dərəcəsi 4-5%, Braziliyada orta hesabla 17%-dir.
Avstraliya, Kanada, ABŞ və Yaponiyada ƏDV tətbiq olunmur, satışdan vergi tutulur. Bu növ verginin orta dərəcəsi bölgələrdən asılı olaraq ABŞ-da 2-15%, Avstraliyada 10%, Yaponiyada 8%, Kanadada 5-6%-dir.
Səidə Hüseynova
