Komitə sədri yarım illik hesabat verib
Əmlak Məsələləri Dövlət Komitəsində 2018-ci ilin yanvar-iyun ayları ərzində görülmüş işlər və qarşıda duran vəzifələrə dair geniş müşavirə keçirilib. İyulun 23-də yayılan rəsmi məlumata görə, müşavirədə çıxış edən komitə sədri Kərəm Həsənov deyib ki, vətəndaşlara göstərilən elektron xidmətlərin sayı 38-ə çatıb, daşınmaz əmlak üzərində hüquqların dövlət qeydiyyatı ilə bağlı ərizələrin icra müddəti isə bir, üç və yeddi iş günü müddətinə endirilib.
Kərəm Həsənov deyib ki, bu ilin ilk altı ayında dövlət əmlakının özəlləşdirilməsi ilə bağlı ümumilikdə 100-dən artıq hərrac keçirilib, 500-ə yaxın dövlət əmlakı, o cümlədən torpaq sahələri və nəqliyyat vasitələri özəlləşdirilib.
Komitə sədri 19 rayonda torpaqların elektron kadastr uçotuna alınması işlərinin yekunlaşdığını vurğulayıb.
Məruzədə bildirilib ki, bu ilin ilk yarısı ərzində torpaqlardan təyinatına uyğun və səmərəli istifadə üzrə nəzarət tədbirləri davam etdirilib, 340 hal üzrə inzibati protokol tərtib olunub.
Kərəm Həsənovun sözlərinə görə, 2018-ci ilin yanvar-iyun aylarında 100 mindən çox daşınmaz əmlak obyekti üzərində mülkiyyət hüquqları qeydiyyata alınıb, 15-ə yaxın rayonda vətəndaşlara ünvanındaca qeydiyyat xidmətləri göstərilib.
