“Qarabağ”ın yeni mümkün rəqibləri
İyulun 23-də UEFA Çempionlar Liqasının 3-cü mərhələsinin püşkü atılıb. Novator.az-ın məlumatına görə, 24 iyul-1 avqust arası keçiriləcək 2-ci raundda Albaniyanın “Kukesi” klubu ilə üz-üzə gələcək ağdamlılar mərhələ adlayacağı halda BATE (Belarus) – HİK (Finlandiya) cütlüyünün qalibinə rəqib olacaq.
3-cü mərhələ 7-15 avqust aralığına təyin edilib.
“Qarabağ” 1-ci mərhələdə Sloveniyanın “Olimpiya” komandasını ələyib (0:0, 1:0).
4-cü raundda (21-29 avqust) “Qarabağ”ın mümkün rəqibləri sırasında PSV (Hollandiya), “Yanq Boyz” (İsveçrə) komandaları yer alır.
26 komanda turnirə qrup mərhələsindən (18 sentyabr-12 dekabr) başlayacaq: “Barselona”, “Atletiko”, “Real”, “Valensiya” (İspaniya), “Bavariya”, “Şalke”, “Hoffenhaym”, “Borussiya” Dortmund (Almaniya), “Mançester Siti”, “Mançester Yunayted”, “Tottenhem”, “Liverpul” (İngiltərə), “Yuventus”, “Napoli”, “Roma”, “İnter” (İtaliya), PSJ, “Monako”, “Lion” (Fransa), “Lokomotiv” Moskva, SSKA (Rusiya), “Portu” (Portuqaliya), “Şaxtyor” (Ukrayna), “Brügge” (Belçika), “Qalatasaray” (Türkiyə), “Viktoriya” (Çexiya).
“Kukesi” səddini aşa bilməsə, “Qarabağ” Avropa Liqasına ələnib 3-cü mərhələdə “Torpedo” (Gürcüstan) – “Vikinqur” (Farer adaları) görüşünün qalibi ilə oynayacaq.
