Orduya yeni tapşırıqlar
Ermənistan Silahlı Qüvvələrinin atəşkəs rejimini pozması nəticəsində Azərbaycan Ordusunun əsgəri Alışov Səməd Anar oğlu şəhid olub. Müdafiə Nazirliyi rəsmi xəbəri iyulun 21-də yayıb.
APA-nın məlumatına görə, şəhid əsgər həmin gün doğulduğu Qəbələ rayonunda dəfn edilib. 1999-cu il təvəllüdlü əsgərlə Ziring kənd qəbiristanlığında keçirilən vida mərasiminə Müdafiə Nazirliyinin, Səfərbərlik və Hərbi Xidmətə Çağırış üzrə Dövlət Xidmətinin, Qəbələ Rayon İcra Hakimiyyətinin rəsmiləri, rayon ictimaiyyətinin nümayəndələri qatılıb.
Mod.gov.az xəbər verir ki, iyulun 21-i Mərkəzi Komanda Məntəqəsində müdafiə naziri Zakir Həsənovun rəhbərliyi altında rəhbər heyətin iştirakı, həmçinin video vasitəsilə cəbhə bölgəsində yerləşən birlik və birləşmə komandirlərinin cəlb olunması ilə xidməti müşavirə keçirilib.
Keçirilmiş təlimlərin, komandanlar və komandirlərin məruzələrinin, qoşunların fəaliyyətinin yoxlanmasının nəticələri əsasında cəbhə bölgəsindəki və qoşunların digər dislokasiya yerlərindəki vəziyyəti təhlil edən müdafiə naziri göstərişlər verib.
Gizli idarəetmə və maskalanmanın tələblərinə ciddi riayət etməklə ehtimal olunan döyüş əməliyyatları istiqamətlərində qüvvə və vasitələrin vaxtında cəmləşdirilməsi məqsədilə qoşunların operativliyinin, döyüş hazırlığının, bölmələrin, birləşmələrin yüksək manevrlilik və dəqiq qarşılıqlı fəaliyyətinin artırılması üzrə vəzifələr müəyyən edilib.
Müşavirə zamanı ümumi təhlükəsizlik məsələlərinə, xüsusilə də yanğın təhlükəsizliyi qaydalarına ciddi riayət olunması, həmçinin qoşunların fasiləsiz və hərtərəfli təminatı ilə əlaqədar tapşırıqlar qoyulub.
