Hamı ələndi, qaldı “Qarabağ”
Azərbaycan UEFA Avropa Liqasında təmsilçisiz qalıb. Novator.az-ın məlumatına görə, 1-ci mərhələdə yarışan Azərbaycan klubları iyulun 19-da cavab oyunlarını keçiriblər. “Neftçi” Macarıstanda “Uypeşt” komandasına 0:4 hesabı ilə uduzaraq ələnib. İlk oyunda “Neftçi” üstün olmuşdu – 3:1.
Rəqib meydanında Lüksemburqun “Proqres” klubu ilə görüşən “Qəbələ” 1:0 hesabı ilə qələbə qazansa da, mərhələ adlaya bilməyib. Azərbaycan komandası evdə 0:2 hesabı ilə uduzmuşdu.
“Keşlə“nin Bakıda Maltanın “Balzan” komandasını 2:1 hesabı ilə udması da yetərsiz olub. İlk oyunda bakılılar 1:4 hesabı ilə yenilmişdilər.
Beləliklə, Azərbaycanın Avropanın klub turnirlərində yalnız bir təmsilçisi qalır. UEFA Çempionlar Liqasında mübarizə aparan “Qarabağ” 24 iyul-1 avqust arası keçiriləcək 2-ci raundda Albaniyanın “Kukesi” klubu ilə üz-üzə gələcək.
3-cü mərhələdə (7-15 avqust) “Qarabağ”ın mümkün rəqibləri sırasında “Zalsburq” (Avstriya), AEK (Yunanıstan), 4-cü raundda mümkün rəqibləri sırasında PSV (Hollandiya), “Yanq Boyz” (İsveçrə) komandaları yer alır.
