Dövlət Miqrasiya Xidmətinin 6 aylıq hesabatı
Dövlət Miqrasiya Xidmətinin (DMX) rəsmi hesabatına görə, 2018-ci ilin ilk 6 ayında ölkəyə 827 min 352 əcnəbi və vətəndaşlığı olmayan şəxs gəlib.
Yanvar-iyun aylarında 347 min 767 əcnəbi və vətəndaşlığı olmayan şəxs olduğu yer üzrə qeydiyyata alınıb.
DMX-yə ölkə ərazisində olmaq və yaşamaq icazələrinin, haqqı ödənilən əmək fəaliyyətinin həyata keçirilməsi üçün iş icazələrinin, qaçqın statusunun alınması, Azərbaycan vətəndaşlığına qəbul, bərpa, xitam və vətəndaşlıq mənsubiyyətinin müəyyənləşdirilməsi ilə bağlı 38 min 360 müraciətin daxil olduğu bildirilir.
Daimi yaşamaq üçün icazə verilmiş əcnəbi və vətəndaşlığı olmayan şəxslərin sayı 1859 göstərilir.
İyulun 1-nə ölkədə 32 min 648 nəfər müvəqqəti, 11 min 288 nəfər daimi yaşamaq üçün icazə əsasında yaşayan əcnəbi və vətəndaşlığı olmayan şəxs var.
Hesabat dövründə DMX-yə vətəndaşlıq mənsubiyyətinin müəyyən edilməsi ilə bağlı 13 min 341 müraciət daxil olub.
Xarici ölkələrdə qeyri-müəyyən vəziyyətdə yaşayan 206 Azərbaycan vətəndaşı geri qaytarılıb.
Miqrasiya qanunvericiliyinin tələblərini pozmuş 9603 əcnəbi və vətəndaşlığı olmayan şəxs, həmçinin Azərbaycan Respublikası vətəndaşları barəsində müvafiq qərarlar qəbul edilib.
Ölkədə rəsmi qaçqın statusu əsasında yaşayan şəxslərin sayı 75 nəfərdir.
