Birləşmiş müxalifət seçkiyə kiminlə gedir?
Gürcüstanda birləşmiş müxalifət prezident postuna sabiq xarici işlər naziri, Vahid Milli Hərəkat Partiyasının üzvü Qriqol Vaşadzenin namizədliyini irəli sürüb.
Prezident seçkisi 2018-ci ilin oktyabr ayında keçiriləcək.
Novator.az-ın məlumatına görə, Qriqol Vaşadzenin namizədliyini ana müxalifət qurumu olan Vahid Milli Hərəkat Partiyası ilə yanaşı 9 partiya dəstəkləyir. Həmin partiyalar iyulun 16-da “Güc birlikdədir” adlı ictimai hərəkat yaradıb.
Qriqol Vaşadze 1958-ci ildə Tbilisidə anadan olub. Moskva Dövlət Beynəlxalq Münasibətlər İnstitutunu bitirib, SSRİ Xarici İşlər Nazirliyinin aspirantı olub. 1981-1988-ci illərdə SSRİ Xarici İşlər Nazirliyində çalışıb.
1990-2008-ci illərdə Qriqol Vaşadze fərdi bizneslə məşğul olub və bir sıra şirkətlərə rəhbərlik edib.
2008-ci ilin fevralında Qriqol Vaşadze Gürcüstan xarici işlər nazirinin müavini təyin edilib. Bu postda bir neçə ay çalışan Qriqol Vaşadze həmin ilin noyabrında mədəniyyət, abidələrin mühafizəsi və idman naziri postuna təyin olunub.
2008-ci ilin dekabrında ona xarici işlər naziri postu həvalə edilib. Qriqol Vaşadze həmin postda 2012-ci ilin sonunadək, ölkədə hakimiyyət dəyişikliyinə qədər işləyib.
Vahid Milli Hərəkat Partiyasını 2001-ci ildə Mixail Saakaşvili yaradıb.
Gürcüstanda prezidentin səlahiyyətləri məhduddur. Hökuməti 150 yerlik parlamentə azı 76 mandat əldə edən partiya formalaşdırır. 2016-cı ilin oktyabrında keçirilmiş son parlament seçkisində Gürcü Arzusu – Demokratik Gürcüstan Partiyası 115 mandat qazanıb. 2012-ci ildə qurulmuş partiya həmin ilin oktyabr ayından hakimiyyətdədir.
Səidə Hüseynova
