Azərbaycan və İtaliya prezidentləri görüşüb
İtaliya prezidenti Serco Mattarella iyulun 17-də Azərbaycana rəsmi səfərə gəlib. Bakının hava limanında ali qonağı baş nazirin birinci müavini Yaqub Eyyubov, xarici işlər nazirinin müavini Xələf Xələfov və digər rəsmi şəxslər qarşılayıb.
AZƏRTAC xəbər verir ki, iyulun 18-də rəsmi qarşılanma mərasimindən sonra prezident İlham Əliyev Serco Mattarella ilə təkbətək görüşüb. Görüşdə Azərbaycanla İtaliya arasında ikitərəfli münasibətlərin siyasi, iqtisadi və digər istiqamətlərdə uğurla inkişaf etdiyi vurğulanıb. Söhbət zamanı ikitərəfli münasibətlər və qarşılıqlı maraq doğuran digər məsələlər ətrafında fikir mübadiləsi aparılıb.
Dövlət başçıları nümayəndə heyətlərinin iştirakı ilə geniş tərkibdə də bir araya gəliblər.
Geniş tərkibdə görüşdən sonra İlham Əliyevin və Serco Mattarellanın iştirakı ilə bu sənədlər imzalanıb: “Azərbaycan Memarlıq və İnşaat Universiteti ilə İtaliyanın Milan Politexnik Universiteti arasında anlaşma memorandumu”; “Azərbaycan Dəmir Yolları” Qapalı Səhmdar Cəmiyyəti ilə İtaliya Dövlət Dəmir Yolları arasında anlaşma memorandumu”; “Azərbaycan Respublikasının Kənd Təsərrüfatı Nazirliyi ilə İtaliya Respublikasının Səhiyyə Nazirliyi arasında baytarlıq təbabəti üzrə texniki anlaşma”; “Azərbaycan Respublikasının Təhsil Nazirliyi ilə İtaliya Respublikasının Təhsil, Universitetlər və Tədqiqat Nazirliyi arasında ali təhsil üzrə əməkdaşlıq barədə birgə bəyannamə.
Mərasim prezidentlərin mətbuata bəyanatları ilə başa çatıb.
