Vergilərin az olduğu 10 ölkə
Ən az vergi tətbiq edən 10 ölkənin siyahısı açıqlanıb. Novator.az-ın məlumatına görə, siyahıya başçılıq edən Kayman adalarında gəlir vergisi tətbiq olunmur. Ölkə vətəndaşları belə vergi ödəmir, dövlətin gəlir mənbəyi müxtəlif rüsumlar və ödənişlərdir.
Baham adalarında da gəlir vergisi 0%-dir. Bu ölkədə vətəndaşlar daşınmaz əmlak dəyərinin ilk 50 min dollarının vergisindən də azaddır.
Baham adalarında da dövlətin əsas gəliri müxtəlif rüsum və yığımlardan formalaşır.
Qvatemalada fiziki şəxslər üçün vergi dərəcəsi 7%-dir. 2008-ci ildə vergi dərəcəsi 31% olub.
Bu ölkədə hüquqi şəxslər gəlirdən 25%, satışdan 12% vergi ödəyir.
Bolqarıstanda fiziki şəxslər üçün bütün növ gəlirlərə 10% vergi tətbiq olunur. Hüquqi şəxslər üçün də vergi dərəcəsi 10%-dir.
Boliviyada gəlir vergisi 13% təşkil edir, ancaq avtomobil, alkoqol və ya ətriyyata tətbiq olunan vergi dərəcəsi 18%-dən 50%-ə qədər dəyişir.
Əlavə dəyər vergisi isə 13%-dir.
Litvada fiziki şəxslər üçün bütün gəlir növlərinə 15% vergi tətbiq olunur. Ölkədə həmçinin mənzil, təhsil, köçmə və yaşayış dəyərinin artımına görə vergi sistemi var.
ƏDV 21%-dir, ancaq bəzi hallarda bu dərəcənin aşağı salınmasına imkan verilir.
Rumıniyada fiziki şəxslər və hüquqi şəxslər üçün 16% gəlir vergisi tətbiq edilir. 1995-ci ildə 38%-lik gəlir vergisi olub.
Bundan başqa Rumıniyada şirkətlər 23,45%, işləyən fiziki şəxslər isə 16,5% sosial sığorta haqqı ödəyir.
Ukraynada gəlir vergisi dərəcəsi 18%-dir. Bundan əlavə ölkədə hərbi yardım qismində 1,5% müvəqqəti əlavə vergi tutulur.
Sinqapurda xüsusi vergi dərəcəsi sistemi mövcuddur. 320 min dollardan yuxarı olan istənilən gəlirə 22% vergi tətbiq olunur, 22 min dollardan aşağı gəlirdən isə heç bir vergi tutulmur.
Bu ölkədə mirasa və ya kapital artımına görə vergi tətbiq olunmur. Hüquqi şəxslər isə 17% gəlir vergisi ödəyir.
Latviyada fiziki şəxslər üçün vergi dərəcəsi 23%-dir. Amma gəlir növündən asılı olaraq bəzi istisnalar mövcuddur.
Bu ölkədə hüquqi şəxslər 15% gəlir vergisi verir.
Səidə Hüseynova
