Neft Fondunun 38 milyard 36,1 milyon dolları var
Dövlət Neft Fondu gəlir və xərclərinin hesabatını yayıb. Rəsmi məlumata görə, 2018-ci ilin yanvar-iyun aylarında fondun gəlirləri 9 milyard 173,7 milyon manat, xərcləri 4 milyard 731,6 milyon manat olub.
6 ayda dövlət büdcəsinə 4 milyard 608 milyon manat vəsait köçürülüb. Qaçqın və məcburi köçkün ailələrinin məskunlaşdırılması və sosial-məişət vəziyyətinin yaxşılaşdırılması üzrə tədbirlərə 84,5 milyon manat, Samur-Abşeron suvarma sisteminin yenidən qurulmasına 19,1 milyon manat, Bakı-Tbilisi-Qars yeni dəmir yolu layihəsinin maliyyələşdirilməsinə 7,5 milyon manat vəsait ayrılıb.
2 milyon manat vəsait 2007-2015-ci illərdə Azərbaycan gənclərinin xarici ölkələrdə təhsili üzrə dövlət proqramının maliyyələşdirilməsinə yönəldilib.
Fondun idarə edilməsi ilə bağlı xərclər 10,5 milyon manat göstərilir.
Valyuta məzənnələrinin dəyişməsindən yaranan fərqlə bağlı büdcədənkənar xərclər 838,5 milyon manat təşkil edib.
2018-ci il iyulun 1-nə fondun aktivləri ilin əvvəlinə nisbətən 6,22% artaraq 38 milyard 36,1 milyon ABŞ dollarına çatıb.
