Hər beş turistdən biri Körfəz ölkələrindən gəlir
2018-in yanvar-iyun aylarında Azərbaycana 189 ölkədən 1 milyon 325 min və ya ötən ilin ilk yarısı ilə müqayisədə 10,2 faiz çox əcnəbi və vətəndaşlığı olmayan şəxs gəlib. Novator.az-ın məlumatına görə, Dövlət Statistika Komitəsi bildirir ki, gələnlərin 30,5 faizi Rusiya, 21,1 faizi Gürcüstan, 11,1 faizi İran, 10,8 faizi Türkiyə, 3,6 faizi Birləşmiş Ərəb Əmirlikləri, 2,1 faizi İraq, 2 faizi Ukrayna, 18,7 faizi digər ölkələrin vətəndaşları, 0,1 faizi vətəndaşlığı olmayan şəxslərdir.
Ötən ilin yanvar-iyun ayları ilə müqayisədə Körfəz ölkələrindən (Küveyt, Səudiyyə Ərəbistanı, Bəhreyn, Qətər, Oman, İraq, Birləşmiş Ərəb Əmirlikləri, İran) gələnlərin sayı 4,9 faiz artaraq 276,6 min nəfərə çatıb. Ümumilikdə gələnlərin demək olar hər beş nəfərindən biri Körfəz ölkələrindəndir.
Hesabata əsasən, 6 ayda Avropa İttifaqına üzv ölkələrdən gələnlərin sayı 6,3 faiz artaraq 53,5 min nəfər, MDB ölkələrindən gələnlərin sayı 7,5 faiz artaraq 478,3 min nəfər olub.
Yanvar-iyun aylarında xarici ölkələrə gedən Azərbaycan vətəndaşlarının sayı əvvəlki ilin eyni dövrü ilə müqayisədə 6,3 faiz artaraq 2 milyon 19,8 min nəfərə yüksəlib. Ölkə vətəndaşlarının 30,7 faizi Gürcüstana, 28,7 faizi İrana, 21,2 faizi Rusiyaya, 12,7 faizi Türkiyəyə, 1,7 faizi Ukraynaya, 1,2 faizi Birləşmiş Ərəb Əmirliklərinə, 3,8 faizi isə digər ölkələrə səfər edib.
İrana gedən Azərbaycan vətəndaşlarının sayı 22,8 faiz artıb, Türkiyəyə gedənlərin sayı 6,8 faiz, Gürcüstana gedənlərin sayı 0,7 faiz, Rusiyaya gedənlərin sayı 2,6 faiz azalıb.
