Dövlət Məşğulluq Xidməti 6 ayın hesabatını verib
Əmək və Əhalinin Sosial Müdafiəsi Nazirliyi bildirir ki, Dövlət Məşğulluq Xidməti 2018-ci ilin birinci yarısında 37613 nəfər işsiz və işaxtaran vətəndaşı münasib işlərlə təmin edib, bu da ötən ilin müvafiq dövrünə nisbətən 11,8 faiz çoxdur.
Hesabata görə, yanvar-iyun aylarında 510 nəfər ödənişli əsaslarla ictimai işlər alıb, 1501 nəfər üçün peşə hazırlığı kursları təşkil edilib, 69,2 min nəfər gənc peşəyönümü tədbirlərinə cəlb olunub.
Dövlət Məşğulluq Xidmətinin əmək birjalarının 1410 nəfəri müvəqqəti xarakterli işlərə göndərdiyi vurğulanır.
6 ayda ölkənin 10 rayon və şəhərində əmək yarmarkaları keçirilib, 280 müəssisədən 3 minədək vakant iş yeri təqdim edilib, 4 ali təhsil müəssisəsində tələbə və məzunların əmək bazarına inteqrasiyasının dəstəklənməsi məqsədilə “Karyerada ilk addım” devizi ilə aktiv tədbirlər təşkil olunub.
Dövlət Statistika Komitəsinin hesabatına görə, iyulun 1-nə ölkədə iqtisadi fəal əhalinin sayı 5 milyon 108,9 min nəfər olub, onların 4 milyon 856,5 min nəfərini məşğul əhali təşkil edib. Məşğulluq xidməti orqanları 36,6 min nəfərə rəsmi işsiz statusu verib, işsizlik müavinətinin və işsizlikdən sığorta ödənişinin orta məbləği 287,2 manat olub.
