Mer postuna namizəd var, seçki yox
Ermənistan paytaxtına yeni mer seçilməsi düyünə düşüb. İyulun 16-sı Yerevan Şəhər Şurasında mer seçkisi olmalı idi. Ancaq iclasa 65 deputatın yalnız 5-i gəlib.
Yerevanın əvvəlki meri, sabiq prezident Serj Sərkisyanın sədrlik etdiyi Respublika Partiyasının üzvü Taron Marqaryan iyulun 9-da istefa verib.
Novator.az-ın məlumatına görə, mer postuna yeganə namizəd Əriklər Ölkəsi Partiyasının lideri Zarui Postancyandır.
Yerevan Şəhər Şurasında 46 mandatla təmsil edilən Respublika Partiyası və 14 yeri olan “Çıxış” bloku namizəd irəli sürməyiblər.
Zarui Postancyan 1972-ci ildə Yerevanda doğulub. Hüquqşünasdır. 2007-2017-ci illərdə parlamentin deputatı olub. Onun 2017-ci ildə yaratdığı Əriklər Ölkəsi Partiyasının Yerevan Şəhər Şurasında 3 mandatı var.
İki həftə müddətində meri seçmək mümkün olmasa, 2017-ci ilin mayında formalaşmış Yerevan Şəhər Şurası buraxılmalıdır.
