Mandatı alan qərardan necə şikayət veriləcək?
Prezident İlham Əliyev İnzibati Prosessual Məcəlləyə dəyişiklikləri təsdiqləyib. Yenilik deputatın mandatdan məhrum edilməsi haqqında qərardan şikayət üzrə icraatın xüsusiyyətlərini tənzimləyir.
Normaya görə, Milli Məclisin deputatının mandatdan məhrum edilməsi haqqında Mərkəzi Seçki Komissiyasının qərarının mübahisələndirilməsinə dair iddia ərizəsi apellyasiya instansiyası məhkəməsinə həmin qərar rəsmi dərc edildiyi gündən 10 gün müddətində verilir. İddia ərizəsinə məhkəmə 15 gün müddətində baxılmalı və onun mahiyyəti üzrə qərar qəbul edilməlidir. Proses ərizəçinin və Mərkəzi Seçki Komissiyasının nümayəndəsinin iştirakı ilə keçirilir. Məhkəmə iclasının vaxtı və yeri haqqında lazımi qaydada xəbərdar edilmiş göstərilən şəxslərin məhkəməyə gəlməməsi işə baxılmasına və onun həll edilməsinə mane olmur.
İş üzrə apellyasiya instansiyası məhkəməsinin qərarından həmin qərarın tam formada təqdim olunduğu gündən 10 gün müddətində Ali Məhkəməyə şikayət verilə bilər. Ali Məhkəmə şikayətə onun daxil olduğu vaxtdan 15 gün müddətində baxıb qərar qəbul etməlidir.
Novator.az bildirir ki, Mərkəzi Seçki Komissiyası deputatı bu hallarda mandatdan məhrum edə bilər:
1) seçkilər zamanı səslərin düzgün hesablanmadığı aşkar olunduqda;
2) Azərbaycan Respublikası vətəndaşlığından çıxdıqda və ya başqa dövlətin vətəndaşlığını qəbul etdikdə;
3) cinayət törətdikdə və məhkəmənin qanuni qüvvəyə minmiş hökmü olduqda;
4) dövlət orqanlarında vəzifə tutduqda, din xadimi olduqda, sahibkarlıq, kommersiya və başqa ödənişli fəaliyyətlə məşğul olduqda (elmi, pedaqoji və yaradıcılıq fəaliyyəti istisna olmaqla);
5) özü imtina etdikdə;
6) konstitusiyanın 93-cü maddəsinin III hissəsinin tələbini pozduqda;
7) deputat üçün qanunla müəyyən edilmiş etik davranış qaydalarını kobud surətdə pozduqda.
Ana qanunun 93-cü maddəsinin III hissəsinə görə, Milli Məclisin deputatları səsvermə hüququnu şəxsən həyata keçirirlər.
