Prezident: “Azərbaycan işğalın nəticələrini yaxşı anlayır”
AZƏRTAC prezident İlham Əliyevin NATO-nun 12 iyul tədbirindəki çıxışının mətnini yayıb. İlham Əliyev həmin gün Brüsseldə NATO-nun Əfqanıstanda həyata keçirdiyi əməliyyata töhfə verən tərəfdaş ölkələrin dövlət və hökumət başçılarının və potensial əməliyyat tərəfdaşlarının iştirakı ilə qətiyyətli dəstək missiyası üzrə Şimali Atlantika Şurasının görüşünə qatılıb.
NATO-nun mənzil-qərargahına gedən dövlət başçısı Türkiyə prezidenti Rəcəb Teyyub Ərdoğan, Bosniya və Herseqovinanın Rəyasət Heyətinin sədri Bakir İzetbeqoviçlə çay süfrəsində söhbətləşib.
Qətiyyətli dəstək missiyası üzrə Şimali Atlantika Şurasının görüşündə İlham Əliyev bunları deyib: “Azərbaycanla NATO arasında güclü tərəfdaşlıq əlaqələri regional təhlükəsizlik və sabitlik məsələlərində mühüm rol oynayır. 2002-ci ildən başlayaraq Azərbaycan sülhməramlıları NATO hərbçiləri ilə Əfqanıstanda çiyin-çiyinə xidmət edirlər. 2018-ci ilin yanvar ayından Azərbaycan qətiyyətli dəstək missiyasındakı hərbçilərinin sayını 30 faiz artıraraq 120 nəfərə çatdırıb.
Azərbaycan bir neçə dəfə Əfqanıstan milli ordusu üçün etimad fonduna maliyyə dəstəyi göstərib. Biz Azərbaycanda Əfqanıstan ordusunun şəxsi heyəti üçün təlimlər təşkil edirik. Özündə 200-dən çox ictimai xidməti birləşdirən “ASAN xidmət” Əfqanıstanda tətbiq olunur.
Azərbaycan qətiyyətli dəstək missiyasına nəqliyyat dəstəyi və logistik dəstək də göstərir. Ötən ilin oktyabr ayında Bakı-Tbilisi-Qars dəmir yolunun istifadəyə verilməsi bu missiyaya tranzit dəstəyi göstərilməsinə böyük kömək edib.
Ötən il Azərbaycan “Asiyanın qəlbi – İstanbul prosesi”nə həmsədrlik, keçən ay isə Beynəlxalq Təmas Qrupunun toplantısına ev sahibliyi edib.
Ermənistanın təcavüzündən əziyyət çəkən və bu təcavüz nəticəsində beynəlxalq səviyyədə tanınmış ərazisinin 20 faizi işğal olunmuş, bir milyon soydaşına qarşı məlum acınacaqlı etnik təmizləmə törədilmiş Azərbaycan işğalın və dağıntının iqtisadi və humanitar nəticələrini yaxşı anlayır.
Azərbaycan NATO-nun və bu təşkilata üzv dövlətlərin ölkəmizin siyasi müstəqilliyinə, suverenliyinə, ərazi bütövlüyünə və Ermənistanla münaqişənin bu prinsiplərə əsaslanan həllinə verdiyi davamlı dəstəyi yüksək qiymətləndirir.
Azərbaycan Əfqanıstanın üzləşdiyi təhlükəsizlik təhdidlərinin aradan qaldırması, ölkədə sülh və inkişafın əldə edilməsi işinə köməyini bundan sonra da davam etdirəcək”.
