Mərhum zabitlər təltif olunub
İyulun 13-də prezident İlham Əliyev sərəncam imzalayaraq Gəncədəki qarşıdurmada həlak olmuş polis zabitləri İlqar Məmməd oğlu Balakişiyevi və Səməd Yunis oğlu Abbasovu “Azərbaycan Bayrağı” ordeni ilə təltif edib.
İyulun 10-u axşam dini radikallar Gəncə Şəhər İcra Hakimiyyətinin inzibati binasının önündə aksiya keçirməyə cəhd göstərib. Aksiya iştirakçıları polis əməkdaşlarına küt və kəsici-deşici alətlərlə müqavimət göstərib, Gəncə Şəhər Baş Polis İdarəsinin rəis müavini polkovnik İlqar Balakişiyev və Nizami Rayon Polis İdarəsinin rəis müavini polkovnik-leytenant Səməd Abbasov həlak olublar.
Zabitlər iyulun 11-i Gəncənin Şəhidlər xiyabanında dəfn ediliblər.
Polis zabitlərini 1988-ci il təvəllüdlü Gəncə şəhər sakinləri Rəşad Böyükkişiyev və Fərrux Qasımovun öldürdükləri bəyan edilib.
Fərrux Qasımov iyulun 11-də həbs olunub. Rəşad Böyükkişiyevin Şəmkir rayonunun Moranlı kəndindəki gizləndiyi yer müəyyən edilib və tutulması üçün iyulun 13-ü səhər saatlarında əməliyyat keçirilib. Onun silahlı müqavimət göstərdiyindən məhv edildiyi açıqlanıb.
Baş Prokurorluq Gəncə hadisələrini Cinayət Məcəlləsinin 120.2.3-cü, 120.2.7-ci, 220.1-ci, 221.3-cü, 228.4-cü və 315.2-ci maddələri ilə araşdırır.
Rəsmi məlumata əsasən, 10 iyul cinayətinin fəal iştirakçılarından 11 nəfər tutulub.
