İşgüzar forum, yeni kreditlər
İqtisadiyyat Nazirliyinin Sahibkarlığa Kömək Milli Fondu iyulun 13-ü Qubanın Timiryazev kəndində işgüzar forum keçirib. AZƏRTAC xəbər verir ki, tədbirdə Quba-Xaçmaz iqtisadi rayonundan 28 sahibkara 3,3 milyon manat güzəştli kredit verilib. Kreditlərin heyvandarlıq, quşçuluq, bağçılıq, logistik mərkəzin yaradılması və s. sahələrin inkişafına yönəldiləcəyi, 120-dən çox yeni iş yerinin açılmasına imkan verəcəyi bildirilir.
Fondun icraçı direktoru vəzifəsini icra edən Arif Vəliməmmədov forumda deyib ki, bu il 622 sahibkar 100,3 milyon manat güzəştli kredit alıb: “Bu investisiya layihələrinin reallaşdırılması 7 mindən çox yeni iş yerinin yaradılmasına imkan verir”.
Diqqətə çatdırılıb ki, indiyədək Quba-Xaçmaz iqtisadi rayonunda fəaliyyət göstərən 2 min 600-dən çox sahibkarın investisiya layihəsinin maliyyələşdirilməsinə 196,8 milyon manat güzəştli kredit ayrılıb.
