Brüsseldə rəsmi qəbul və görüş
İyulun 11-i Brüsseldə NATO-nun müttəfiq və tərəfdaş ölkələrinin dövlət və hökumət başçıları üçün qəbul təşkil edilib. Qəbula Azərbaycan prezidenti İlham Əliyev də qatılıb.
Həmin gün İlham Əliyev Əfqanıstan İslam Respublikasının prezidenti Məhəmməd Əşrəf Qəni ilə bir araya gəlib. AZƏRTAC xəbər verir ki, görüşdə iki ölkə arasında müxtəlif sahələrdə uğurlu əməkdaşlığın həyata keçirildiyi qeyd olunub, Azərbaycanın Əfqanıstana humanitar sahədə göstərdiyi dəstək xüsusi vurğulanıb.
Söhbət zamanı regional məsələlər ətrafında fikir mübadiləsi aparılıb, Azərbaycanın Əfqanıstanda sülhün bərqərar edilməsi istiqamətində xüsusi rolu qeyd edilib.
Prezidentlər iki ölkə arasında iqtisadi sahədə əməkdaşlığın perspektivlərinə də toxunublar.
