Binəli Yıldırım Türkiyə parlamentinin sədri seçildi
İyulun 12-də Türkiyə Böyük Millət Məclisinə sədr seçkisi keçirilib. Novator.az-ın məlumatına görə, beş nəfərin yarışdığı seçkidə Ədalət və İnkişaf Partiyasının namizədi, sonuncu baş nazir Binəli Yıldırım üçüncü turda 335 səslə qalib gələrək parlament sədri kürsüsünə oturmaq haqqı qazanıb.
Binəli Yıldırım 1955-ci ildə doğulub. Ədalət və İnkişaf Partiyasının qurucularındandır. 2002-ci ildən bütün hökumətlərdə təmsil olunub, 2016-2018-ci illərdə baş nazir postunu tutub.
600 nəfərlik yeni parlamentdə Ədalət və İnkişaf Partiyasının 294, Cümhuriyyət Xalq Partiyasının 144, Xalqların Demokratik Partiyasının 67, Milliyyətçi Hərəkat Partiyasının 49, Yaxşı Partiyanın 43, Səadət Partiyasının 2, Böyük Birlik Partiyasının 1 mandatı var.
Türkiyədə iyunun 24-də keçirilmiş prezident və parlament seçkilərindən sonra ölkənin idarə üsulu dəyişib: baş nazir postu ləğv edilib, dövlət başçısı Rəcəb Teyyub Ərdoğan həm də hökumət başçısı statusu alıb.
