Baş nazir hökuməti yenilədi
Gürcüstanın yeni hökumətində 10 nazir, 1 dövlət naziri olacaq. Novator.az-ın məlumatına görə, parlament hökumətin strukturunu dəyişib, nazirliklərin sayı 13-dən 10-a enib. Birləşdirmələr yolu ilə Təhsil, Elm, Mədəniyyət və İdman Nazirliyi; Məcburi Köçkünlər, Əmək, Səhiyyə və Sosial Müdafiə Nazirliyi yaradılıb. Cəzaların İcrası və Probasiya Nazirliyi isə Ədliyyə Nazirliyinə birləşdirilib.
İyunun 20-dən baş nazir postunu tutan Mamuka Baxtadze iyulun 11-də hökumətin tərkibində dəyişikliklər edib. Maliyyə naziri postuna İvane Maçavariani, iqtisadiyyat və davamlı inkişaf naziri vəzifəsinə Georgi Kobuliya, təhsil, elm, mədəniyyət və idman naziri vəzifəsinə Mixail Batiaşvili gətirilib. Bu yenilikləri parlament təsdiqləməlidir.
Gürcüstanda hökuməti 150 yerlik parlamentə azı 76 mandat əldə edən partiya formalaşdırır. 2016-cı ilin oktyabrında keçirilmiş son parlament seçkisində Gürcü Arzusu – Demokratik Gürcüstan Partiyası 115 mandat qazanıb. 2012-ci ildə qurulmuş partiya həmin ilin oktyabr ayından hakimiyyətdədir.
