Bəzi yerlərdə işıqlar yenə sönüb
İyulun 12-si saat 16 radələrində ölkənin, o cümlədən paytaxtın bəzi yerlərində işıqlar yenə sönüb.
“Azərenerji” ASC-nin ictimaiyyətlə əlaqələr şöbəsinin rəhbəri Yəhya Babanlı mediaya açıqlamasında deyib ki, Ağsu rayonunun Bico kəndinə yaxın ərazidən keçən yüksək gərginlikli elektrik verilişi xətlərinin altında naməlum səbəbdən yanğın baş verib. Buna görə də təhlükəsizlik məqsədilə ölkənin bəzi bölgələrinə, həmçinin paytaxtın bəzi yerlərinə enerji verilişi dayandırılıb.
Nəticədə saat 16:10-dan 16:30-dək Bakı metrosunun “Avtovağzal” və “Memar Əcəmi” stansiyalarında qatarların hərəkəti də dayanıb, bu stansiyalara giriş bağlanıb. Tuneldə qatar qalmayıb.
Digər stansiyalarda problem olmayıb.
Paytaxtın bəzi küçələrində svetoforlar da sönüb. Bakı Nəqliyyat Agentliyinin mətbuat xidmətinin rəhbəri Mais Ağayev mediaya bildirib ki, həyata keçirilən tədbirlər nəticəsində bir çox küçə və prospektdə svetoforların fəaliyyəti bərpa edilib: “Bütün svetoforların normal rejimdə fəaliyyəti üçün zəruri tədbirlər görülür”.
“Azərişıq” ASC saat 17:30 radələrində məlumat yayıb. Məlumatda deyilir: “Azərenerji” ASC-yə məxsus 500 kilovatlıq Abşeron yüksək gərginlikli hava elektrik verilişi xətlərinin Ağsu rayonu Bico kəndi ərazisində yanğın baş verib və nəticədə Bakı şəhəri, Abşeron yarımadası və regionlarda elektrik enerjisi təchizatında 27% həcmində məhdudiyyət tətbiq olunub. “Azərişiq” ASC öz şəbəkələri vasitəsilə birinci kateqoriyalı obyektlərin – Bakı metrosu, Heydər Əliyev hava limanı, su-kanalizasiya, xəstəxanalar, dövlət əhəmiyyətli obyektlərin elektrik enerjisi təchizatında məhdudiyyətlər tətbiq etməyib, hazırda həmin obyektlər elektrik enerjisi ilə tam təmin olunur”.
Ağsu rayonunun Bico kəndinə yaxın ərazidə yanğın iyulun 12-si saat 14:35 radələrində başlayıb. Rayon fövqəladə hallar komissiyasından AZƏRTAC-a verilən məlumata görə, biçilmiş taxıl sahələrindən başlayan yanğın şimal dağlıq ərazilərinə tərəf irəliləyib. Saat 17:30-dək 50 hektardan çox biçilmiş taxıl, quru ot və kol-kos sahələri yanıb. Yanğının qarşısının alınması üçün Ağsu, habelə Şamaxı və Göyçay rayonlarının yanğından mühafizə xidmətlərinin qüvvələri cəlb olunub.
Novator.az xatırladır ki, bu ay Mingəçevir şəhərindəki “Azərbaycan İstilik Elektrik Stansiyası” MMC-nin ərazisində üç dəfə qəza baş verib. İyulun 3-nə keçən gecə elektrik stansiyasının yarımstansiyalarından birində cərəyan transformatorunda yanğınla nəticələnən qəza nəticəsində Bakı və Gəncə şəhərləri də daxil olmaqla ölkənin 39 şəhər və rayonu işıqsız qalıb. Həmin gün saat 19 radələrində baş verən ikinci qəza nəticəsində işığı kəsilən şəhər və rayonlarda oxşar problemlər yaşanıb, eyni zamanda Bakı metrosu iyulun 4-ü günortayadək fəaliyyət göstərə bilməyib.
İyulun 3-də prezident İlham Əliyev qəza ilə əlaqədar dövlət komissiyası yaradıb, iyulun 4-də isə komissiya üzvlərinin iştirakı ilə müşavirə keçirib.
“Azərbaycan İstilik Elektrik Stansiyası” MMC-nin ərazisində iyulun 5-i səhər baş verən və tezliklə qarşısı alınan üçüncü yanğın elektrik təchizatında fasilənin yaranmasına səbəb olmayıb.
Qəza ilə bağlı komissiya yaradıldı
Prezident Administrasiyasının məlumatı
Enerji müşavirəsində sərt sözlər
