Xorvatiya, ya İngiltərə?
Novator.az futbol icmalçısı Rasim Mövsümzadənin 2018-ci ilin dünya çempionatı ilə bağlı yeni təqdimatını diqqətə çatdırır.
Rusiyada keçirilən çempionatda Fransa milli komandası finala adlayıb. İyunun 11-nə təyin olunmuş ikinci yarımfinalda Xorvatiya ilə İngiltərə üz-üzə gəlir. Moskvanın “Lujniki” stadionunda keçiriləcək oyunu türkiyəli baş hakim Cüneyt Çakır idarə edəcək.
İlk dəfə müstəqil ölkə kimi DÇ-1998-də iştirak edən Xorvatiya tarixində 2-ci dəfə mundialın yarımfinalında təmsil olunur. 1998-ci ildə gələcək çempion Fransaya uduzan (1:2) xorvatlar həmin yarışı 3-cü yerdə başa vurublar. Ondan sonra iştirak etdiyi üç dünya çempionatında qrupda qalan, DÇ-2010-a ümumiyyətlə çıxa bilməyən Xorvatiya su polosunda 2 dəfə, həndbolda isə 1 dəfə dünya çempionluğunun sevincini yaşayıb.
Xorvatlar hazırkı mundialda iki oyunun gedişində birinci olaraq qapılarından top buraxsalar da, ruhdan düşməyərək məğlubiyyətdən xilas ola biliblər. Onlar həmçinin 1990-cı ildə ardıcıl iki mərhələdə penaltilər seriyasında qalib gələn Argentina komandasının nailiyyətini təkrarlayıblar.
İngiltərə millisinin cinah yarımmüdafiəçisi Eşli Yanq isə bu faktın onların xeyrinə olduğunu düşünür: “Xorvatların ardıcıl iki matçın hər birində 120 dəqiqə oynamaları bizim üçün əlavə üstünlük ola bilər”.
Yeri gəlmişkən, hər iki komanda bu mundialda məhsuldar oyunu ilə fərqlənir: ingilislər ilk beş oyunda 11, xorvatlar isə 10 qol vurublar.
Xorvatlar üçün uğurlu DÇ-1998-də Davor Şuker 6 qolla mundialın bombardiri olmuşdu. Komandanın indiki heyətində isə səkkiz futbolçu fərqlənib, onlardan da yalnız Luka Modriç rəqib qapısına 2 dəfə yol tapa bilib.
Maraqlıdır ki, xorvatlarda Modriç, ingilislərdə isə Harri Keyn hərəyə 3 dəfə “matçın oyunçusu” seçiliblər.
15-ci dəfə mundialda çıxış edən İngiltərə millisi tarixində 3-cü dəfə yarımfinalda oynayacaq. 1966-cı ildən dünya çempionu olan ingilislər DÇ-1990-da da 4-cü yeri tutublar.
Futbolçu kimi DÇ-1998-də 2 oyunda forma geyinən, DÇ-2002-də də ehtiyatda qalan ingilislərin hazırkı baş məşqçisi Qaret Sautgeyt komandasına güvənir: “Bizim inanılmaz mehriban komandamız var və uğurumuzun əsas səbəbi budur. İngiltərə millisi əsl zəhmətkeşlərin komandasıdır”.
İngiltərə millisinin heyətində “Tottenhem” klubunun hamıdan çox – 5 futbolçu ilə təmsil olunması da diqqət çəkir. Xorvatların heyətində isə yalnız 29 yaşlı müdafiəçi Deyan Lovren İngiltərə Premyer Liqasında – “Liverpul”da çıxış edir.
Rəqiblərin şəxsi görüşlərinə gəlincə, onlar dünya və Avropa çempionatlarının final turnirində cəmi bir dəfə qarşılaşıblar: Avro-2004-ün qrup oyununda ingilislər 4:2 hesabı ilə qalib gəlib. Ondan sonra Avro-2008-in seçmə mərhələsində iki qələbəyə sevinən (2:0 və 3:2) xorvatlar DÇ-2010-un seçmə mərhələsində isə hər iki görüşdə məğlub olublar – 1:4 və 1:5. Özü də 2009-cu ildə Londonda qeydə alınan 1:5 hesabı Xorvatiya millisinin tarixində ən böyük məğlubiyyətdir.
