“Ayastan”a müvəqqəti rəhbər gəlir
Ermənilərin ən böyük xeyriyyə təşkilatı olan “Ayastan” beynəlxalq fonduna müvəqqəti direktor gəlir.
1992-ci ildə yaradılmış “Ayastan” fondu indiyədək Ermənistanda və Dağlıq Qarabağda müxtəlif layihələr üçün 350 milyon dollara yaxın vəsait toplayıb. Qurumun Himayəçilik Şurasına Ermənistan prezidenti başçılıq edir.
“Ayastan”ın direktoru Ara Vardanyan iyulun 10-da istefa verib. Ermənistanın Milli Təhlükəsizlik Xidməti Ara Vardanyanı fondun vəsaitlərini şəxsi məqsədlər üçün istifadədə təqsirləndirir. Rəsmən bəyan olunub ki, Ara Vardanyan “Ayastan” fonduna məxsus vəsaitlərdən kazinoya 130 milyon dram pul qoyub.
Novator.az-ın məlumatına görə, iyulun 11-də Ermənistan prezidenti Armen Sərkisyan Himayəçilik Şurasının üzvlərinə müraciətində Ara Vardanyanın istefasının qəbul olunmasını istəyib. Dövlət başçısı “Ayastan” fondunun direktorunun səlahiyyətlərini müvəqqəti olaraq Himayəçilik Şurasının üzvü, Fransa bölməsinin rəhbəri Petros Terzyana həvalə olunmasını təklif edib. Direktor seçimi üçün Petros Terzyanın sədrliyi ilə müsabiqə komissiyasının yaradılması da tövsiyə olunub.
Səidə Hüseynova
