Bakı ziyarəti, təkbətək görüş
İyulun 10-da prezident İlham Əliyev Bakıda türkiyəli həmkarı Rəcəb Teyyub Ərdoğanla bir araya gəlib. AZƏRTAC xəbər verir ki, təkbətək görüşdə Azərbaycanla Türkiyə arasında münasibətlərin bütün sahələrdə uğurla inkişaf etdiyi bildirilib, ikitərəfli münasibətlər və qarşılıqlı maraq doğuran digər məsələlər ətrafında fikir mübadiləsi aparılıb.
Sonra işçi nahar çərçivəsində geniş tərkibdə görüş olub.
Rəcəb Teyyub Ərdoğan iyunun 24-də yenidən prezident seçilib, iyulun 9-da səlahiyyətlərinin icrasına başlayıb. İndi o həm dövlət, həm də hökumət başçısıdır.
Novator.az bildirir ki, 1954-cü il fevralın 26-sı İstanbulda doğulan Rəcəb Teyyub Ərdoğan Mərmərə Universitetinin iqtisadiyyat və ticarət fakültəsini bitirib.
Siyasətlə 1976-cı ildən məşğuldur. Milli Salamat, Rifah, Fəzilət partiyalarının üzvü olub.
1994-1998-ci illərdə Rəcəb Teyyub Ərdoğan İstanbul bələdiyyəsinin başçısı postunu tutub.
2001-ci ildə Ədalət və İnkişaf Partiyasını yaradıb. Bu partiya 2002-ci ildən təkbaşına hakimiyyətdədir (13 seçkilik zəfər).
Rəcəb Teyyub Ərdoğan 2003-cü ildən baş nazir olub. 2014-cü ilin avqustunda prezident seçilib.
