Yerevan meri istefa verdi
Ermənistan paytaxtı Yerevanın meri, Respublika Partiyasının üzvü Taron Marqaryan iyulun 9-da istefa verib. Mer səlahiyyətlərinin icrası müvəqqəti olaraq müavin Kamo Areyana keçib.
Novator.az bildirir ki, Taron Marqaryan 2011-ci ildən Yerevan meri idi. Yerevan Şəhər Şurasına 2017-ci ilin mayında keçirilmiş seçkini onun üzvü olduğu Respublika Partiyası udub. Proporsional üsulla seçilən 65 yerlik Şəhər Şurasında mandatların yarıdan çoxunu götürdüyü üçün Respublika Partiyasının siyahısına başçılıq edən Taron Marqaryan postunu qoruyub. Onun əsas rəqibi Vətəndaş Sazişi Partiyasının lideri, indiki baş nazir Nikol Paşinyan olub.
Nikol Paşinyan mayın 8-dən baş nazirdir. 2008-2018-ci illərdə prezident postunu tutan Respublika Partiyasının sədri Serj Sərkisyan aprelin 17-də baş nazir kürsüsünə oturub, ancaq xalq etirazlarına görə aprelin 23-də istefa verməyə məcbur olub. Xalq etirazlarına Nikol Paşinyan başçılıq edib.
Nikol Paşinyan hakimiyyətə gələndən bəri bir çox fəal Taron Marqaryanın istefası tələbini irəli sürürdü.
1978-ci ildə anadan olan Taron Marqaryan Ermənistan Kənd Təsərrüfatı Akademiyasını bitirib. Respublika Partiyasına 1996-cı ildə qoşulub. Yerevan Şəhər Şurasına ilk dəfə 2009-cu ildə seçilib.
