Xidmət hesabatları
2018-ci ilin ilk yarısında Əmək və Əhalinin Sosial Müdafiəsi Nazirliyinin Protez-Ortopedik Bərpa Mərkəzi, onun Gəncə filialı və Naxçıvan istehsalat sahəsi əlilliyi olan 4722 nəfərə protez-ortopedik bərpa xidmətləri göstərib. Onların 600 nəfərə qədəri ölkənin ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlil olmuş vətəndaşlardır.
Yanvar-iyun aylarında əlilliyi olan şəxslərin 12825 protez-ortopedik məmulat və reabilitasiya vasitəsi ilə təminatı həyata keçirilib. 308 nəfər əlilliyi olan şəxsə stasionar şəraitdə reabilitasiya xidmətləri göstərilib.
Başqa bir rəsmi hesabata görə, yanvar-iyun aylarında Əmək və Əhalinin Sosial Müdafiəsi Nazirliyi 1587 nəfəri peşə hazırlığı və əlavə təhsil kurslarına cəlb edib. Onların 1501 nəfəri üçün peşə hazırlığı və əlavə təhsil kursları açılıb. Kurslarda dülgər-xarrat, əməliyyatçı mühasib, elektrik-qaz qaynaqçısı, kompüter istifadəçisi, avtomobil təmiri üzrə çilingər, qənnadıçı, dərzi, bərbər, xalçaçı, ofisiant, toxucu, tornaçı, mebel quraşdırıcısı və s. peşələr öyrədilib. 86 nəfər gənc isə Dövlət Sosial Müdafiə Fondunun 1 saylı Sağlamlıq İmkanları Məhdud Gənclərin Peşə Reabilitasiya Mərkəzinə qəbul olunub.
Dövlət Məşğulluq Xidmətinin yanvar-iyun aylarında keçirdiyi peşəyönümü tədbirlərinə əksəriyyəti yuxarı sinif şagirdləri olan 69,2 min nəfər gənc cəlb edilib.
