Nümunəvi nizamnamə üç idarəetmə formasını nəzərdə tutur
Prezidentin yaratdığı publik hüquqi şəxslərin nümunəvi nizamnaməsi təsdiqlənib. Novator.az bildirir ki, dövlət başçısı İlham Əliyevin fərmanı ilə nümunəvi nizamnamə publik hüquqi şəxslərin nizamnamələrinin layihələri hazırlanarkən əsas hesab ediləcək.
Sənədə əsasən, prezidentin yaratdığı publik hüquqi şəxs dövlət başçısının müəyyən etdiyi sahədə fəaliyyət göstərir. Qurum prezidentin müəyyən etdiyi hallarda müvafiq sahədə dövlət siyasətinin formalaşmasında iştirak edir və bu siyasətin həyata keçirilməsini təmin edir, tənzimləməni və nəzarəti həyata keçirir.
Qurumun nizamnaməsində bu idarəetmə formalarından biri müəyyənləşdirə bilər: Müşahidə (Direktorlar) Şurası və təkbaşçı icra orqanı (direktor, baş direktor, icraçı direktor); Müşahidə (Direktorlar) Şurası və İdarə Heyəti; İdarə Heyəti.
Qanuna görə, publik hüquqi şəxs ümumdövlət və (və ya) ictimai əhəmiyyət daşıyan fəaliyyətlə məşğul olan, dövlət və ya bələdiyyə orqanı olmayan təşkilatdır.
