Azərbaycan Diasporuna Dəstək Fondu nə iş görəcək?
Prezident İlham Əliyev Diasporla İş üzrə Dövlət Komitəsinin tabeliyində publik hüquqi şəxs statuslu Azərbaycan Diasporuna Dəstək Fondu yaradılmasına fərman verib, onun nizamnaməsini təsdiqləyib.
Nazirlər Kabinetinə fondun strukturunu, işçilərinin say həddini və əməkhaqqı fondunu təsdiqləmək həvalə olunub.
Novator.az bildirir ki, nizamnaməsinə görə, Azərbaycan Diasporuna Dəstək Fondunun məqsədi ölkənin mənafelərinin müdafiəsinə, lobbiçilik fəaliyyətinin güclənməsinə, diaspor təşkilatlarının fəaliyyətinə və mütəşəkkilliyinin möhkəmlənməsinə dövlət dəstəyi göstərməkdir.
Fondun idarəetmə orqanları Müşahidə Şurası və icraçı direktordur. Müşahidə Şurası fonda ümumi rəhbərliyi və nəzarəti həyata keçirir, sədr də daxil olmaqla üç üzvdən ibarətdir. Qurumun üzvlərini Diasporla İş üzrə Dövlət Komitəsinin sədri təyin edir. Şura ictimai (ödənişsiz) əsaslarla fəaliyyət göstərir.
Fondun cari fəaliyyətinə icraçı direktor rəhbərlik edir. İcraçı direktoru və onun iki müavinini şura vəzifəyə təyin edir.
Fondun nizamnamə fondu 500 yüz min manatdır.
