Vergi orqanlarına müraciətlər 10 faiz azalıb
Vergilər Nazirliyinin Media və Kommunikasiya Mərkəzi bildirir ki, 2018-ci ilin may ayında vergi orqanlarına 8288 müraciət daxil olub: “Bu, ötən ilin müvafiq dövrü ilə müqayisədə 10 faiz azdır. Müraciətlərin 92,5 faizi ərizə, 7,2 faizi şikayət, 0,2 faizi təklif olub, 37,8 faizi kameral vergi yoxlamalarını, 30,9 faizi müxtəlif arayışların alınmasını, 10,6 faizi vergi borclarını, 3,4 faizi vergidən yayınma, qanunsuz sahibkarlıq fəaliyyətini, nağd hesablaşmaların aparılması qaydalarının pozulmasını, 2 faizi vergi qanunvericiliyinin tətbiqini, qalanları digər məsələləri əhatə edib. Müraciətlərin 75 faizi müsbət həll olunub.
Ay ərzində vergi orqanlarının müxtəlif səviyyədə rəhbər vəzifəli şəxsləri və vergi əməkdaşları 459, vergi orqanlarının aidiyyəti struktur bölmələrinin və vahidlərinin rəhbərləri və digər vəzifəli şəxsləri 492 vətəndaşı qəbul edib”.
