Sabunçuda “Kütləvi çıxarış”
Əmlak Məsələləri Dövlət Komitəsi iyulun 6-sı Bakının Sabunçu rayonunda, yeni tikilmiş çoxmərtəbəli binada “Kütləvi çıxarış” kampaniyası keçirib. Rəsmi məlumata görə, 100-ə yaxın vətəndaşa çıxarışlar təqdim olunub, 50-yə yaxın sakindən ilkin mülkiyyət sənədləri alınıb.
Sakinlərin mənzillərə, torpaq sahələrinə çıxarışların, texniki pasportların, yüklülük arayışlarının və digər sənədlərin əldə olunması ilə bağlı sualları cavablandırılıb, onlara hüquqi məsləhətlər verilib.
Hesabata əsasən, bu ilin ilk yarısı ərzində Əmlak Məsələləri Dövlət Komitəsi ümumilikdə 13 “Kütləvi çıxarış” kampaniyası reallaşdırıb. Paytaxtın müxtəlif rayonları ilə bərabər Ağcabədi, Qazax, Balakən, Astara, Ağdam və digər bölgələrdə yaşayan əhali evlərini, iş yerlərini, əkin sahələrini tərk etmədən operativ qeydiyyat xidmətlərindən istifadə edib.
