Sabiq baş nazir 10 il həbs cəzası aldı
Pakistanda məhkəmə sabiq baş nazir Nəvaz Şərifi 10 il həbs cəzasına məhkum edib. Novator.az-ın məlumatına görə, Nəvaz Şərif korrupsiyada təqsirli bilinib.
1949-cu il təvəllüdlü Nəvaz Şərif 1990-1993, 1997-1999, 2013-2017-ci illərdə baş nazir postunu tutub.
2016-cı ildə “Panama sənədləri” qalmaqalında adı hallanandan sonra Nəvaz Şərifə korrupsiya ittihamı irəli sürülüb. 2017-ci il iyulun 28-də Ali Məhkəmə onu tutduğu vəzifəyə uyğun hesab etmədiyi üçün Nəvaz Şərif istefa verib.
2016-cı ildə Panamanın “Mossack Fonseca” hüquq firmasından milyonlarla sənəd Britaniya mediasına sızıb. Britaniya mediası həmin sənədləri təhlil edərək “Panama sənədləri” adı altında geniş bir araşdırma materialı dərc edib. Sənədlər göstərib ki, “Mossack Fonseca” firması çirkli pulları yumaq, sanksiyalardan yan keçmək və vergidən yayınmaq istəyən xeyli müştəriyə xidmət edirmiş. Firmanın belə müştəriləri arasında ictimai-siyasi şəxslər, ö cümlədən dövlət və hökumət başçıları olub.
Səidə Hüseynova
